當我打好咗一份辭職信嘅時侯，我就開始係到諗依封信究竟係咩時侯送上去又或者扔左佢。
一個人係咩時侯最能夠清楚見到自己嘅能力不足? 就係當遇上難題同埋要作出選擇嘅時侯，種種性格價值觀同顧慮會令你選擇唔到要用咩方法去解決件事同作出咩決定，我會見到自己嘅軟弱，每次作出選擇時都唔會以自己利益為依歸，總係為人諗左先，盡量唔好因為個「決定」而傷害到其他人，但凡事豈能完美，顧得一邊又顧唔到另一邊，最後停滯不前，顯得更加迂腐。
當見到自己缺點一一浮現係眾人面前，就覺得好討厭，接受唔到咁嘅自己。
早排同親戚食飯，親戚突然提起一個話題，佢話:「阿明，你都出黎做野做左半年啦，有咩大計? 即管開聲，錢銀方面可以幫手，寫份Proposal比我就得架啦!」親戚此言唔係突然，一直以來我都成日提出自己想點樣創業，想自己做老闆唔洗受人氣，亦可以搵多啲錢，以往黃毛小子嘅我說出依啲咁宏觀嘅野會比人當係笑話，一句:「等你大個仔先講啦!」
如今大學畢業，踏出社會工作後，親戚一席話令我諗起以前雄心壯志嘅我，唔知幾時開始忘記左依團火，又唔知幾時開始覺得以往所諗嘅野都係不設實際，會係到諗:「攪咁多做咩丫!安安份份打份工就算囉。」最後一笑置之，不了了之。
最近煩惱很多，好似一下子湧埋黎，但要分享心事嘅人不多，都無力氣由頭到尾講一次比人聽亦都唔知點樣組織講出黎，唯有搵一啲涉及事件中嘅人商量。不過就算傾幾耐，傾成晚都好，都係無結果，重點係出於我身上。
「初入黎時侯，你雙眼個團火令我好深刻，我唔識你，但我見到你讀書個陣，facebook拎住支咪係人群中發聲，我相信你心入面都有一套自己嘅想法同堅持嘅價值觀，但依家嘅你......我真係睇唔到你嘅底線係咩，你套價值觀又係咩，連拒絕人嘅勇氣都無，究竟你係咪真係當左依份係一份「普通嘅工」而無左自己個套堅持?
一席話令我好慚愧，特別係出於一位女士口中。
究竟我人生目標係咩? 我所追求又係咩? 我生活動力來源又係咩? 20歲至到30歲係男人博殺時期，我究竟想係依段時期得到啲咩?
個人開始頹廢，即使放假都留係屋企訓覺，咩都唔想理，呆呆訓係床邊，望住窗外白朦朦一片，就好似我對前路一樣，睇唔透。
望住封辭職信，更加睇唔透。
Search